CARTA A SAN MARTÍN 2020

Muy queríu santín, patrón de nos:

Un añu más vamos contate lo qu'asocedió dende l'añu pasáu, que nun ye pocu. ¿quién nos diba a dicir fai un añu que diba pasar tolo que tamos pasando? Ai, santín, mira per nos y per tol mundu, que s'acabe llueu esta peste, que s'atope remediu, que nun muerra naide más en soledá, que la xente pueda volver al trabayu, que podamos dir recuperando. Y lo más importante de too, que nun perdamos la esperanza, qu'aprendamos a valorar lo que realmente importa, que nos curiemos perque asina curiamos a los demás.

L'añu pasáu'l día de la to fiesta pasamoslo perbién, xuntámonos 72 persones pa la comida de les bodes de plata de La Piedriquina; na sobremesa proyectóse un video que recoyía les coses que fixera esta asociación, a lo que siguió'l baile de costume cola collaboración tan valoratible de José Luis Cuesta, que siempre pon lo que meyor sabe faer, cantar.

La meyor noticia foi el descubrimiento al completu del segundu mosaicu de la villa de San Martín de La Estaca, sí ellí onde tiempu más tarde fixieron la to primer ilesia. Foi visitao a la fin de la campaña por más de 1000 persones y tovía hubo daquien que nun pudo llegar a velu. Un gran trabayu gracies a l’asociación “Amigos de la villa de San Martín de La Estaca” que lu promueve y de toos los mecenes que punxeron perres, y del meyor equipu d’arqueólogos. Foi un hecho perimportante pa esti conceyu. L'Asociación de Guíes Turísticos d'Asturies, APIT concedió en enero su premio anual a esta asociación. A finales d’esi mes presentáronse los resultados de la campaña nel Club de Prensa de La Nueva España que s’enllenó hasta la bandera, teniendo que quedar mucha xente ensin poder pasar.

Nel branu consiguieronse perres pa otra campaña, más piquiñina, onde afayáronse dos edificios onde vivía xente corriente. Ye bonu saber eso pa valorar más la dómina y les sos costumes. Pedimoste ayuda pa que pueda siguise y dalgún día pueda ser enseñao al mundu y dea muncha vida a Les Regueres. 

Tuvimos una prestosa misa casi familiar la tarde la Nuechebona.

Luis Parades ganó'l premiu de Pieza Única na Feria d'artesanía de Navidá d'Uviéu y agora ye finalista de los Premios Nacionales d'Artesanía. Oxalá quede ente los meyores porque la so obra lo merez.

Ramón Fernández-Mijares foi condecoráu cola Cruz de San Raimundo de Peñafort, la máxima condecoración para un abogáu.

En Parades yá viven de seguío Jovino y Marisol que mercaron yá va un tiempu l'antigua casa Vicente. Deseyamos que vivan equí munches y bones esperiencies.

En primavera llegó'l confinamientu, foi duru, pero, equí, nesti paraísu nun podemos quexanos, somos afortunaos de vivir onde vivimos. Lo malo ye la incertidume, la medrana de perder a los seres queríos, pero con la to ayuda pasaresmoslo y seremos meyores persones.

La Piedriquina editó el so Anuariu numberu 13, nun pudo presentase, pero viose que tuvo interés perque a la fin agotose; ye qu’había artículos bien prestosos e importantes. 

Tamos de norabona con les obres de la carretera, facien una falta tremenda y a lo que se ve va a quedar bien reguapa. Llástima qu’acabe ente Ca Celo. Nun tien sentíu que nun llegue a La Granda, paez mentira que per menos d’un kilometru va quedar mal. 

Tamién hai que cellebrar que se llimpió La Margüera, gracies al interés d’dellos  vecinus y del conceyal de Mediu Ambiente que convocó sendes estaferies. Tovía queda trabayu por facer, pero yá vinieron una parexa de coríos a añerar, vuelve la vida a esta güelga, que foi nel pasáu utilizá pa sacar marga p’abonar les tierres.

El día’l Corpus foi la primer vegada que comencipiaron les mises de nuevu. Fiximos una cellebración d’andar per casa, pero con tol ciño pa homenaxar a les persones que se fueron mientres el confinamiento y que nun habíen podíu tener un funeral como deseyaben. Ofreciose la misa per ellos y per los sos families, con aplausos pa los vecinos tan queríus y llamentando que d’algunos que tuvieron qu’ingresar nel hospital los postreros díes nun pudieron despedise ni compartir esi adiós. Les families llevaron un ramín de romero, lavanda, lloréu y tomillu, cola semeya de cada unu, como símbolu de plantas curatives que curaren tambien un pocu la pena. Compartimos con ellos el su dolor y eso ayudoyos un pocoñin. Depués foron faciendose los funerales a lo llargo del branu, daqué que deseaban con afinco.

Pal Cristo l’asociación de Les Rameres pagó los gaiteros pa allegranos un pocu. La Piedriquina nomó reguerano del añu a Fonsu Les Regueres, el nuestru Fonso. Foi una sorpresa total, pero teníen asegurau que venía, xugaron con ventaxa. Los meritos de Fonso son grandes, bien grandes. El so descubrimientu del metodu de Cogollu y d’otros facedores de gaites, revoluciona esti mundu y, lo meyor de tooo, punxolo xunto col so collaborador Pelayo Fernández, a disposición de quien quiera. Ye grande, ¿eh santín? Qué te vamos dicir si yá lu conoces de ciruelo...

Ñacieron d'algunos neños: Mauro, fíu d’Alicia Xepe, Olivia, fía de Patricia’l Ricu, María, fía de Fernando, Nora fía de Julia Corredoria y Gael, nietu de Miguel de Miobra. Mira per ellos santín, que sían felices y tou váiga-yos bien. 

Nésti añu tuvimos que despedir a bonos vecinos, xente que lluchó per esta tierra nuesa y ameyoró la nuesa redolada: María el Mantequeru, Pepa Fausto, Pepe Sidru, José Alonso, Carmen Berlique, Ricardo’l barberu, Paco, Álvaro de La Rodada, Lola Xuacu, Aurelio Berlique y Luisa Asunción. Tenlos sol to cuidu y hasta que los volvamos a ver que Dios los guarde na palma de la so mano.

Queremos pidite ayuda cola peste, ayuda pa los sanitarios que nos curien, ayuda para tener cabeza y sentíu común y cumplir los encamientos a raxatabla, por nós y por tolos demás. Si lo facemos bien y tú dasnos un pequeñu emburrión, de seguro que lo llogramos. Y que nun nos falte nin un solu día la esperanza y la molición pola familia, los amigos, tolos los que nun podemos ver como quixiéramos, pero sobre manera per aquellos vecinos que sabemos que tan solos, que toos somos la tu familia y que nos ayudemos y llevemos toos bien. 

Asina que, con este deseo de salud y armonía, de poner paz donde haya discordia, despedimonos hasta’l añu venideru. ¡Guardanos santín, a los que tamos aquí y a los que tan pel mundu!

Gracies per too, santín. Milenta y tantos añus en Biedes...

Un abrazu pergrande de toos los tuyos.

CARTA A SAN MARTÍN 2018

Bien queríu santin patrón de toos nós. Güei ye dia de char cuentes, ye como pagar la renta, que anantes les rentes yeren de Samartín a Samartín. Otra vegada más tamos equí pa contate tolo que asucedió dende el añu pasao. Prestanos abondu venir a la to fiestina. Venticuatru años yá que encomencipiamos a facela, y ventiun que te garabatio estes lletres. 

Como  to sabes perbien, nun tenemos guei al nuesu Pablo perque ta n’hospital recuperándose d'una operación, que yá te encargues tu que too y salga bien. Curialo bien, santín que ye una perbona persona y lo merez en forma, amás de lo importante que ye pa nós. 

Yo querría contate que too diba perbién, que nun teníamos esmoliciones, pero nun ye asina. Tamos casi’n pelligru de estinción, van cerrándose cases y nun hai rellevu. Tú que lleves con nós más de milenta y tantos añus, ya veríes de too pero estu tien que tornar pa nun escaecer dafechu. Pidimoste sofitu. 

L’añu pasau fiximos el día Navidá lo del amigu invisible, nun yeramos munchos pero prestonos munchu, tantu que esti añu vamos facelo un pocu primeru, el 15 de avientu que amás tenemos conciertu de villancicos y misa perguapa cantá pel coru Les Regueres. Tu yá sabes qu'eso del amigu invisible nun ye pel detalle que nus damos, que tien  que ser bien pequeñu, sinon pol compromisu de mirar per esi amigu tol añu. Eso ye lo guapo. Asperamos que esti añu se apunten munchos más.

El coru  Les Regueres, qu'una de les cantantes ye de les tuyes, n’abril fixiose internacional, diendo cantar a Praga. La Xordia Les Regueres siempre nus ta dando allegríes dexando bien altu’l pabellón nel concursu de folclor d’Uvieu y per tolos sitios que va llevando'l nome’l conceyu per tol país y parte del estranxeru y nel festival del aniversariu en xulio pasao en Valdunu y nel certame de la Castaña Valduna onde guei faen la III Amuesa de folclor, lo mesmo col so director y fundador, el nuesu Fonsu que recoyó el premiu Memorial Silvino Argüelles al meyor gaiteru acompañante 2018. La xente que fai la ruta de l'alzada a Torrestío en recuerdu de tolos que diben d'esta parroquia y d'otros conceyus asoleyaron una aplicación pal móvil pa poder facer la ruta cuando s’apetezca. A la Reguerana 2017 Lucía Velasco dio-y el Ministeriu d'Agricultura'l premiu nacional a la Excelencia a la innovación pa les muyeres rurales. El actor Mario Tardón de casa L’Talaya trabayó na pelicula "Animales ensin collar", acabante estrenar. A Alberto Álvarez García orixinariu de Ca Xuacu de Biedes acáben de concede-y el Premiu Tiempu de Deporte d'Avilés  pa deportistes con discapacidá física, él foi motor d'arranque d'esti colectivu, fundador de FEDEMA y presidente per tercer mandatu de la federación española y vicepresidente del comité Paralimpico  español, too un exemplu de superación. ¡Qu'arguyosos tamos de toos!

Los de La Piedriquina asoleyaron l'Anuariu numberu 11 y preséntaronlo n’Uvieu y en Llanera, y emprestó perque a les 3 selmanes yá taba agotau. Nomaron regueranos 2018 a Jose Cal Maiso de Pereda per caltener la llabor de la escanda y camudala en ricos panes y llambionaes. Y a Conce, de La Cabaña pel el so bon trabayu al frente los sos negocios, dando vida a Santuyanu y a tol conceyu. Y ayeri mesmo fixieron la postrera actividá de la IV Seronda Cultural, animando y dando a conocer esti conceyu y la so hestoria, dende la presentación de los afayus de L’Astaca per parte de lus arqueologos qu'escavaron, que vieno tanta xente que nun se cabía na escuela; el taller de filar en casa de Paz y Xandru onde deprendimos lo perimportante que ye aprovechar tolos recursos y lo bonu que ye la llana pa vestise. La caminata per onde discurrieron varies escaramuces y batalles na guerra civil en Valdunu foi una guapa experiencia, con dos bonos guías y con xente vistida colos uniformes de la dómina del grupu de recreación histórica Trubia 1916. La representación de la llegada d'Enrique de Trastámara a Escampreru al hospital de pelegrinos de Rodrigo Alfonso y la marcha hasta Noreña de los siete escuderos que lu acompañaron y la charra postrera nel Restorán El Quexu tamién cuntó con grande interés per parte del públicu y ayeri naugurose la Esposición fotográfica de José Mª el de Gal.legos con motivu del centenariu de la so nacencia.  

Pero lo más perimportante que pasó na parroquia foi el descubrimiento d’un nuevu mosaico na villa de San Martín n’Astaca, güeno ya oyiste el guapu pregón de Diego, un mosaico que ye una maravilla polos sus dibuxos y cenefes y perque ye del sieglo segundo y taba ahí, santin, xusto dende llevantaron la tu primera iglesia. Tú ya lo sabíes, eh, pero tenislo bien callao. Agora hai que echar una manina pa que sigan excavando y descubriendo tolo que hai n’esa villa tan grande e importante. ¡Sería la ayalga pa esti probe conceyu! Vendrín turistes de los bonos a coñocela y daría trabayu a los restoranes y a los que se encargaren de enseñala y caltenela. Hai que puxar por ello.

Hubo como siempre fiestes y una especial na que escoyeron al nuesu conceyu nel Día de los Pueblos en Navelgas; equí cellebrose el Corpus con misa y vermú, lo mesmo que los Mártires onde empresta tantu tomar algu debaxu la castañalona y El Cristu con ramera, regueranus, pinchéu y rifes de cestes que algamaron allegría a los afortunaos, too esto ye posible col sofitu de los vecinos, sobre too de Parades que dan güenes cueses pa rifar. Tamién festexamos el santu de Pablu, cuando supimos que taba malu pa day animos y los de Parades xuntámonos alredior de la Fonte Santa con misa, gaita, merienda y la fonte, enramá poles muyeres de Ca Celu. Ye poca fiesta pero que nun falte, mientres podiamos vamus faceles, hai que caltener el raigañu.

Hubo bautizu fai escasos minutos, el de Martina, que escoyeron el día la tu fiesta pa que mires bien per ella. Mercedes y Máximo, cellebraron les sus bodes d’oru xunto a los fíos, nietos y amigos. ¡Qué sigan xuntos munchos más años y con salú!

Vinieron dos neñes saharagüis a pasar el veranu a Mariñes a casa de Clara y Ramón, ¡qué guapu lo que faen!  En Mariñes hai vecinus nuevos, los que vinieron pa Ca Teresa: Javier, Rocío y el el so fío Hugo y en Ca Galán viven Javier y Nuria. En Biedes tamién hai familia nueva, la d'Ana y Santiago colos sos fíos Sergio, Carlos, Antonio y Jaime, los trés postreros comencipiaron equí al colexio de Santuyanu. ¡Qué gustu da qu'haya neños!

Na casona de Mariñes siempres hai movimientu, coles cases rurales, colos campamentos d’inglés pol veranu, coles escursiones de los collexios al centru  mediuambiental y tamién cellebren comuniones y cumpleaños, esos tolos fines de selmana. Cuntamos con una nueva casa de vacaciones, La Terrona que xunto a La Casina traen turistes a Parades. Estes cases y el restorán casa Delmiro abrennos al mundu.

Tamién tuvimos que despedinos d’algunos vecinos, güenes persones que dexen fonda memoria: Jesús de Ca Carbayeda de La Estaca, José Manuel de La Campina, Adolfo Berlique de Recastañoso, Azucena el Picho de Mariñes, Olvido el Maestro de Biedes, Luisa Ramonito de La Braña, Pepe Luis de Ca’l Roxu  de Miobra, Manolo Carís de La Estaca, Azucena Ramón de Biedes, Lola Justo de Biedes, María José de Biedes, José Bernaldo de Recastañoso, Benina Xepe de Parades, Carmina Lala de Mariñes y José Pedro de Biedes. Toos ñacieron o vivieron a la tu solombra, asina que nun t’olvides d’ellos, como de tolos que tan malus, qu’asperan que yos eches una manina.

Mira Samartín por tola xente que tenemos viviendo fora d’Asturies. Y por los que lo tán pasando mal cualesquier sía la causa.

Esta ye la hestoria de esti añu, polu menos la que yo sé, vamos prométete ser un poco más bonos y vamos pedite que dientru un añu nos golvamos a ver y si vienen más, meyor, muncho meyor. Tu yá sabes tolo que nos fai falta, pero ye que prestanos decitelo, p’dalgo yes el patrón, asina que siguimos cuntando contigo como fai milenta y tantos añus yá. Un carrao d'agradecimientos y d'abrazos de tolos tus vecinos de Biedes. ¡Hasta tolos díes, Samartín!

CARTA A SAN MARTÍN 2017

La fiesta de San Martín de Biedes fue la primera actividad que organizó La Piedriquina, hace ya 23 años. Es costumbre ese día leer, durante la misa, una carta en asturiano escrita por Rosa Rodríguez, presidenta de la asociación cultural. En ella le cuenta a San Martín todas las novedades del último año ocurridas en la parroquia. 

Biedes, 11 de noviembre de 2017

Bien queríu santín, patrón de toos nós. 

Güei ye dia de char cuentes, ye como pagar la renta, que anantes les rentes yeren de Samartín a Samartín. Dende el añu 97 vengo escribiéndote, 21 años ya dándote cuentes de lo que acontez periquí. 

Lo primero ye date les gracies porque nus lleves curiando dende fai más de milenta y tantos años, primero dende La Estaca onde tuvisti la primer ilesia, esa que agora parez que van escavar los cimientos los arqueólogos. Lo malu ye que tienen bien pocu presupuestu y debíamos apurrilos un pocoñín, que ye lo nueso, lo más antiguu que tenemos, pero con una condición qu'eso nun ye Andayón, ye La Estaca y ye de Biedes… 

En xineru pasó dalgo perimportante pal conceyu. Foron los de la Ruta d’ alzada a Torrestío a la gran feria de Turismu de Madrid, a Fitur, y allí tuvo la nuesa vecina, la que movió tol cotarru, Maruja La Braña con l’alcaldesa enseñándola al mundu. 

Tamién tuvimos boda, la de Claudia y Jorge. Préstanos abondo que se faigan bodes equí. Y fixieron casa’n Parades, anque entovía nun la estrenaron. Mira per ellos santín, que tan a la tu sombra. 

Los de La Piedriquina asoleyamos el Anuariu 10, numberu redondo. Preséntamoslo na Nueva España n’Uvieu y tamien en Llanera y salió too perguapo, gracies a tola xente que collabora de xuro. Samartín, sabemos que tenemos un pocoñin d’enchufe, perque somos los que entamamos la tu fiestina, pero sigue chándonos una manina, o dos, que sabes que la precisamos. 

Fixieron casa nueva tamién Manuel y Noelia en Biedes y equí viven dende entós. Asina que una familia más que curiar, santín. Que yos vaiga bien. 

Nun sabíamos que teníamos vecinos tan famosos como la gran arpista Danuta Wojnar, en Biedes o el maestro cerveceru de Caleya, Carlos Agelvis en Parades. 

Guárdalos santín, a ellos, y a tolos que vinieron de nueves a vivir con nos. Y también a Fran y la so muyer y los dos fíos que tan arreglando Ca Xepe de Parades pa vivir equí d’afechu. 

Por fin, en xunu, naugurose la Fonte Santa de Parades, foi perguapo el pequeñín homenaxe que fiximos a les muyeres que foron a llavar ellí, unos barquinos de papel col nome de les de cada casa y la fonte, enramá peles muyeres de Ca Celu, taba perguapa, depués la misa de Pentecostés y una merienda ente toos en Ca Corredoira que como llovía, prestaronnos la su casa. Tenemos que repitir perque pasamoslo abondo bien. 

La Xordia Les Regueres, encabezá per Fonsu, al que tú de sobra conoces ya de ciruelo, puxoxe de llargu pa lo so presentación en Santullanu nel mes de xunetu. Tuvo perbien, de guapo, de emotivu y cargao de sinificao per tolo bono que nus va trayer. Qué nun falte nunca una gaita nin el gaiteru. Mira per ellos Samartín. 

Nel veranu lo que nus traxo de cabeza foron les quemes, un día sí y otru tamién. Hubo selmanes qu’hasta 3 vegaes hubo quema. ¡Foi lo nunca vistu! Ye una pena que nun se cazara a quien prendió la mecha. Menus mal que nun hubo que llamentar esgracies personales. Tendríamos que llantar un árbol o dos, per cada uno que quema, sinon el mundo acabarase… 

Otra cosa que nos dexa axustaos, pero muncho, ye el llobu. Dende la primaera vien faciendo fechoríes per tol conceyu ¡probes oveyes y cabritines y hasta delgún xatin! Per ellos nun lloren tantu como per lus llobus. Equí mismo, nel Güertu ‘l Cura mató varies oveyes. A esto tien que ponese remediu. Échanos una manina, anda. 

Diego Valdés, el nietu Arturo, fue ellegío como unu de los meyores árbitros del futbol asturianu na su categoría. Allegrámonos con él. Cuidalo, santín. 

Quique Moradiellos, el fíu de Nedina Corredoria, acaba de recibir el Premiu Nacional d'Hestoria d'España, ¡na menos! Arguyosos de la nuesa xente. Tenlo de la to mano, Samartín. 

Les fiestes tuvieron bien. Al Corpus vieno poca xente, va quedando esta fiesta nel olvidu y había que arreglalo. En Los Mártires hubo una misina guapa y un pincheu baxo la castañalona. ¡Ai, si falara cuanto tendría que cuntanos! Al Cristu vienu muncha xente, munchos al son de los regueranos del anu, que son de primera. Asina pudimos cuntar con animoso y famoso puyador pa la ramera, Ambás; que foi abondo reñida, y con danza prima delantre la ilesia. Tamien con la collaboración de munches persones que dieron donativos pa les cestes, llueu mercaron les rifes y enrriba nun yos tocó ná, pero toos contentos, el casu ye facer dalgo que sirva pa toos. 

Tuvimos como vecines a dos guapes neñes saharauis, Hada y Laila, que les acoyeron na su casa de Mariñes, Ramón y Clara. Mira por ellos, Samartín. Nes cases d‘aldea y en dalguna particular hubo turistes de otres partes del país, toos quedaron percontentos col nueso paixaxe y paixanaxe. Nel Centru Mediuambiental de Mariñes nun daben abastu tantus autocares toles díes. Asina como tolos que pasaron per Ca Delmiro. Eso ye bueno pa equí. 

Dalgunes ganaderíes ganaron abondos premios nel concursu de ganáu de Santullanu, como la de Ca Chinto onde la vaca Linda, proclamose campeona y la Muralla d'Ana Belén de Ca’l Cabu llevó el de la meyor vaca con cría en la mesma categoría. Tamién tuvieron premios n'otros concursos como'l d'Avilés. 

La Piedriquina nomó regueranos a Xandru y Paz de Puerma, exemplo a siguir pola so manera de vida, na so casería al estilu tradicional y a Lucía y Jorge de Escampreru pola bona xestión de la la so ganadería y por siguir col’alzada a Perllunes en Somieu, como lo faíen los sos antepasaos dende más de cuatro sieglos. 

Tamién fixieron la III Seronda Cultural dando a conocer llugares casi desconocios como los acuedutos de Sotu y Barzana y el molín de Aguera na ruta’l agua. Cola mesa redonda de cerveceros de Les Regueres y posterior preba. 

Con la ruta del patrimoniu millitar de Biedes, aonde vinieron más de 50 persones a conocer lo que significó la guerra nestos sitios guiaos maxistralmente por Vicente, nueso pregoneru y por Florentino Glez, con raíces en Parades. Rematando col gran concierto de Menalva en Tresmonte con Danuta Wojnar, el Ché de Cabaños y el grupo de baille tradicional La Xordia y el nueso meyor gaitero, Fonsu. Mira per toa esta xente, santín. 

Tamién hubo nel mes pasáu otra boda, la del pregoneru Vicente cola so muyer Lidia. Allegrámonos y deséamosyos lo meyor. Curialos santín. Cellebraron les su bodes de oro Vicente y Avelina La Braña con segunda lluna de miel, regalu de los sos fíos y Lola, la de López y Fernando. Que cellebren munches más y con salú. 

Ñacieron unos cuantos neños, anque nengún va vivir equí de afecho: Víctor que ñació lloñe, en París, fíu d’Alba de Mariñes; Valeria, nieta d’Isabel y Agustín, que bautizose na capilla los Mártires; Alba, fía de Julia Corredoria; Alejandra, fía de David de Ca Carreño, que bautizose equí fai una semana; Alberto, nietu de Carmina Fernando y Marisa fía de Verónica’l Maestru. ¡Guárdalos bien, santín que son de los tuyos. Qué sían persones de provechu. 

Tamien tuvimos que despidir a delgunos vecinus, sentimoslos como de la familia, foron los nuesos compañeros a lo llargo de la vida: Juaco Xepe, Remedios de Nolo Miguel, Nieves de Vitorio el Cura, Aurelio Carbayeda, Carmina Nonito, Amáu Bonifacio, Lola ‘l Archivo, Laudino Polonia, María’l Ferreru, América de López, Esther de Teresa, David de Asunción Gelina, Pachu y Pepe Luis de Castiello, que vieno a la escuela Biedes y equí fexo la primera comunión, grandes persones que llograron que el nuesu pequeñu mundu fora un poco meyor. Guárdalos a la tu vera, Samartín, que de xuro lo merecen. 

Mira santín por tola xente que tenemos viviendo fora d’Asturies y d’España, a esos curialos especialmente. Y por los que lo tán pasando mal cualesquier sía la causa que cuntamos cola to protección, queríu santin. Y per tolos que trabayen desinteresadamente, pola Xunta Parroquial y per toos los voluntarios. 

Esta ye la hestoria de esti añu, polu menos la que yo sé, vamos prométete ser un poco más bonos y vamos pedite que dientru un añu nos golvamos a ver y si vienen más, meyor, muncho meyor. Tu yá sabes tolo que nos fai falta, pero ye que prestanos decitelo, p’dalgo yes el patrón, asina que siguimos cuntando contigo como fai milenta y tantos añus yá. 

Un carrao d'agradecimientos y d'abrazos de tolos tus vecinos de Biedes. ¡Hasta tolos díes, Samartín!

CARTA A SAN MARTÍN 2016

San Martín de Tours es el patrón de la parroquia de Biedes (Les Regueres). La semana pasada se celebró su festividad y Rosa Mª Rodríguez le leyó la tradicional "Carta a San Martín", carta que lleva escribiendole desde hace 20 años para dar cuenta al santo de las novedades del año, al igual que los renteros pagaban antes las rentas por San Martín.

Muy queríu santín, patrón de nos:

Una vegada más tamos aquí los tus parroquianos pa cellebrar el tu santu, pasar un día xuntos y guárdalo nel recuerdo perque asperamos pásalo abondo bien.

¡Ai, santín! Yo quixera escribite la carta más guapa que se pudiera, que te cuntara que toos tabamos percontentos cola nuesa vida, pero de sobra sabes tú que siempres hai penes, unes vegaes pa unos y otres pa otros. Asina que contarete lo que pasó n’esti añu. 

Como novedá decite que'l grupu de baille La Xordia, fundao pol nuestru Alfonso y allegaos da clases los xueves equí na escuela, vienen rapazos del conceyu y yá salen a bailar per media España. Ye una bona cosa que danos un poco vida al pueblu y al conceyu. Adrián y Carla, de La Xordia, foron campeonos de baile nel Concursu de folklor Ciudad d'Uviéu. Tamos abondu orgullosos d’ellos, curialos santín.

Ye bonu, bien bonu que s'utilice la escuela pa munches actividaes, tamién hai clases de baile de salón, per ello sería bonu tamién que se llimpiasen los canalones que sinón les plantes qu'hai nellos van dar collecha. 

Elvira Caramés la to pregonera del añu pasao alzose col primer premiu nel concursu de platos cocinaos con castañes nel Certame de la Castaña Valduna, una sabrosa receta de sollombu con castañes. Que nun y falte el humor, santín.

Per Navidá dalgunes persones xugamos al amigu invisible. Foi bien prestosu, nun tratábase solu de facer un pequeñu regalín sinon de esmerase de manera especial pol amigu durante’l añu. Asperamos repitir otra vegada. Tamién se recoyeron alimentos y donativos pa la Cocina Económica. Y visitaronse los mayores de la parroquia.

La xente de La Piedriquina, que cumple n’estos díes 22 años, espublizó el anuariu 9 nel mes de marzu y agora fixieron la II Seronda Cultural con visites a la fragua de Cal Ferreru Tuernes, a les termes de Valdunu esplicaes por Rogelio Estrada l'arqueólogu que les escavó, (mira a ver santín si se pue facer daqué pa que sigan trabayando y sacando a la lluz lo que ta escondío) y también fuimos a La Huertina de Toni pa deprender a cultivar d'otra manera y más ecolóxica; a los restos del patrimoniu militar de la parroquia Tresmonte guiaos maxistralmente por Vicente Suárez que nos emocionó y concienzó sobre la inutilidá de les guerres; presentose el llibru de semeyes de 1960 del gran fotógrafu José Mª el de Gallegos y terminaron cola obra de teatru que representaron ayeri mesmo Les Regueranes titulada Los escuderos de Les Regueres faciendo referencia a uno de los fechus históricus más representativus de esti conceyu. Tamién escoyeron regueranos del añu a Aquilino Caramés y a Luis Parades, grandes persones que de sobra lo merecín. 

Fixiose por tercera vegada l'alzada a Torrestío nel mes de mayu y la segunda vuelta a les mariñes nel mes d'ochobre. Ye dalgo bien bonu'l recuperar la memoria histórica de la forma de vida de los vaqueros d'alzada. Samartín si fai falta echaoyos una manina, pue que nun la precisen perque ta arraigándose abondu bien, participando amás nel I Congresu d'Alzada de Barcelona onde Mª Teresa, Maruja La Braña presentó una ponencia sobre la ruta como exemplu d'aprovechamientu turísticu y recuperación del patrimoniu etnográficu, pero per si acasu nun los dexes de la to mano. 

Nel mes de xunetu l'asociación de los vaqueiros d'alzada de Naraval dieronme una reconocencia polos mios trabayos sobre los vaqueros de Les Regueres y Llanera. Ye abondu prestosu que valoren l'el to trabayu, eso da impulsu pa siguir investigando.

Les cases d’aldea de Ca Corredoria, la Casona de Mariñes con su centru d’ educación medioambiental traen a muncha xente forestera a conocer Les Regueres, asina como la que pasa por Ca Delmiro. Curia de toos santin que lu merecen pol so trabayu.

Les ganaderíes de vaques roxes de Lelo’l Cabu y de Chinto tuvieron abondos premios nel certame de gánau del conceyu y tamién n'otros. Empresta como van llevando’l nome ‘l conceyu pol mundu. Gracies a les bones ganaderíes de lleche y de roxes que perviven siguimos considerándonos ganaderos anque lo que más abonde equí seyan les pensiones de los xubilaos.

El 18 de septiembre Arturo Valdés recibió un homenaxe de los sos compañeros d'arrastre de gües. Arturo foi durante años competidor nesta modalidá llogrando bonos premios. Allegramonos abondu per él.

Los vecinos de Parades iguaron la Fonte Santa col dinero que yos quedara de la fiesta’l Espiritu Santu. Entovía nun alcontraron un día pa inaugurala. Va pocayá que llimpió Pelayo Corredoria la llamuerga de alredor. Mira por esti chaval que s'esmolez polo de toos.

En Parades tamos de norabona perque vinieron al pueblo tres nueves families con neñus y eso danos una gran allegría. Marchose en cambio la de Ruht y los sos fios Rodrigo y Alma pa Zaragoza. Que yos vaya bien ellí, santín. Les que vinieron son: Laura y Rubén colos sos fíos Andrea y Álvaro; Laura y Joaquín coles sos fíes Carmen e Inés y Ana y Carlos col so fíu Kevin. Toos van al Colexu de Santuyanu, ye bonu pa toos y empresta oir los neños anque sía berrando por mancase, que si non ta el pueblu muy silenciosu. Mira por toos ellos santín, que agora son de los tuyos. 

Cerróse una casa con muncha tradición, Ca Figo, y tolos vecinos fixieron una comida homenaxe a Josefina que merecíu lo tenía. Dieron –y una bona sorpresa. Curia d’ella y de la so familia que siguen siendo de Samartín. 

Clara y Ramón, vecinos de Mariñes traxeron esti verano, per segunda vegada, a dos neñas saharauis. Allegramonos de la xente xenerosa. Mira per ellos santín que lu merecen.

La revista Casa y Xardín dio-y un nuevo premio a Luis Parades. Ye un orguyo cuntar con xente tan famosa y tan allegá. Y volvió a esponer n’ Australia y en París y n’Estrasburgo, ye internacional.

Casóse Iván de Ca Claudia con Patricia. Mira per ellos Samartín, que too os vaya bien y que tengan abondos neños. Equí nun nació delgún neñu, pero bautizaronse dos ximielgos nel mes de agostu Alejandro y Adrián, fíos d'Ana de Ca Bernaldo de Recastañoso. Anque van vivir nos Madriles nun dexarán los pás que escaezca el vezo de venir a los orixenes. Mira per ellos santín, que sían bones persones. 

Cellebraron les sos bodes de oro Maruja Polonia y Laudino nel mes de febreru. Y Monchi del Bar Nuevu y Ana y Belén de Ca Miranda y Avelino les de plata. Curialos Samartín y que cumplan munchos, munchos más.

El 2 d'ochobre recibimos equí n’esta ilesia al obispu. Parecionos una persona bien campechana y gustonos los que nos dixo. La xente respondió perque a pesar de tar unos cuantos de escursion enllenamos la ilesia. Curia d’ él Samartín que ye el que manda.

Les fiestes salieron bien. Na del Corpus hubo misa de fiesta, procesión y un pinchéu apurrío per La Piedriquina. La de los Mártires tuvo una misa bien prestosa, procesión y un pinchéu so la solombra de la castañalona organizao pola asociación de La Capiya. Y la del Cristu tuvo misa perguapa gracies a Fonso Les Regueres y la so familia que tocaron, bailaron y cantaron. Depués la puya de la ramera con la su xatina y les rifes de cestes aportaes per les donaciones, sobre too, de lus vecinus de Parades, y dalguno de Biedes y Mariñes y un pinchéu ofrecío per l'Asociación de Les Rameres del Cristu con ayuda de La Piedriquina.

Tamién hubo que despidir a delgunes persones que agora asperamos que ten xunto a ti, santín, perque toes son de Samartín: Curia de Maruja Valdés, Carmen Figo, Pili de Ca Silvino, Manolo Cadagüelo, Jamo La Carreña, Remedios de Ca Plazu’l Ricu, María Fernando, grandes persones que tuvimos la gran suerte de que formaren parte de les nueses vides, de querelos y recordalos per siempre. 

Mira santín por tola xente que tenemos viviendo fora d’Asturies y d’España, a esos cuidalos especialmente. Y por los que lo tán pasando mal cualesquier sía la causa que cuntamos cola la to protección, queríu santin. Y per tolos que trabayen desinteresadamente, la Xunta Parroquial y tolos voluntarios.

Y, con esto y un carrao d'agradecimientos, d'abrazos y pidimientos, vamos despedinos anque sía por poco tiempu, pos anque te escribinos namás una vegada al añu, cuntamos contigo tolos dies. 

Queremoste un montón, yes unu más de les nueses families. Gracies por too. Hasta tolos dies, Samartín de Biedes, dende fai más de milenta y cien años.