CARTA A SAN MARTÍN 2018

Bien queríu santin patrón de toos nós. Güei ye dia de char cuentes, ye como pagar la renta, que anantes les rentes yeren de Samartín a Samartín. Otra vegada más tamos equí pa contate tolo que asucedió dende el añu pasao. Prestanos abondu venir a la to fiestina. Venticuatru años yá que encomencipiamos a facela, y ventiun que te garabatio estes lletres. 

Como  to sabes perbien, nun tenemos guei al nuesu Pablo perque ta n’hospital recuperándose d'una operación, que yá te encargues tu que too y salga bien. Curialo bien, santín que ye una perbona persona y lo merez en forma, amás de lo importante que ye pa nós. 

Yo querría contate que too diba perbién, que nun teníamos esmoliciones, pero nun ye asina. Tamos casi’n pelligru de estinción, van cerrándose cases y nun hai rellevu. Tú que lleves con nós más de milenta y tantos añus, ya veríes de too pero estu tien que tornar pa nun escaecer dafechu. Pidimoste sofitu. 

L’añu pasau fiximos el día Navidá lo del amigu invisible, nun yeramos munchos pero prestonos munchu, tantu que esti añu vamos facelo un pocu primeru, el 15 de avientu que amás tenemos conciertu de villancicos y misa perguapa cantá pel coru Les Regueres. Tu yá sabes qu'eso del amigu invisible nun ye pel detalle que nus damos, que tien  que ser bien pequeñu, sinon pol compromisu de mirar per esi amigu tol añu. Eso ye lo guapo. Asperamos que esti añu se apunten munchos más.

El coru  Les Regueres, qu'una de les cantantes ye de les tuyes, n’abril fixiose internacional, diendo cantar a Praga. La Xordia Les Regueres siempre nus ta dando allegríes dexando bien altu’l pabellón nel concursu de folclor d’Uvieu y per tolos sitios que va llevando'l nome’l conceyu per tol país y parte del estranxeru y nel festival del aniversariu en xulio pasao en Valdunu y nel certame de la Castaña Valduna onde guei faen la III Amuesa de folclor, lo mesmo col so director y fundador, el nuesu Fonsu que recoyó el premiu Memorial Silvino Argüelles al meyor gaiteru acompañante 2018. La xente que fai la ruta de l'alzada a Torrestío en recuerdu de tolos que diben d'esta parroquia y d'otros conceyus asoleyaron una aplicación pal móvil pa poder facer la ruta cuando s’apetezca. A la Reguerana 2017 Lucía Velasco dio-y el Ministeriu d'Agricultura'l premiu nacional a la Excelencia a la innovación pa les muyeres rurales. El actor Mario Tardón de casa L’Talaya trabayó na pelicula "Animales ensin collar", acabante estrenar. A Alberto Álvarez García orixinariu de Ca Xuacu de Biedes acáben de concede-y el Premiu Tiempu de Deporte d'Avilés  pa deportistes con discapacidá física, él foi motor d'arranque d'esti colectivu, fundador de FEDEMA y presidente per tercer mandatu de la federación española y vicepresidente del comité Paralimpico  español, too un exemplu de superación. ¡Qu'arguyosos tamos de toos!

Los de La Piedriquina asoleyaron l'Anuariu numberu 11 y preséntaronlo n’Uvieu y en Llanera, y emprestó perque a les 3 selmanes yá taba agotau. Nomaron regueranos 2018 a Jose Cal Maiso de Pereda per caltener la llabor de la escanda y camudala en ricos panes y llambionaes. Y a Conce, de La Cabaña pel el so bon trabayu al frente los sos negocios, dando vida a Santuyanu y a tol conceyu. Y ayeri mesmo fixieron la postrera actividá de la IV Seronda Cultural, animando y dando a conocer esti conceyu y la so hestoria, dende la presentación de los afayus de L’Astaca per parte de lus arqueologos qu'escavaron, que vieno tanta xente que nun se cabía na escuela; el taller de filar en casa de Paz y Xandru onde deprendimos lo perimportante que ye aprovechar tolos recursos y lo bonu que ye la llana pa vestise. La caminata per onde discurrieron varies escaramuces y batalles na guerra civil en Valdunu foi una guapa experiencia, con dos bonos guías y con xente vistida colos uniformes de la dómina del grupu de recreación histórica Trubia 1916. La representación de la llegada d'Enrique de Trastámara a Escampreru al hospital de pelegrinos de Rodrigo Alfonso y la marcha hasta Noreña de los siete escuderos que lu acompañaron y la charra postrera nel Restorán El Quexu tamién cuntó con grande interés per parte del públicu y ayeri naugurose la Esposición fotográfica de José Mª el de Gal.legos con motivu del centenariu de la so nacencia.  

Pero lo más perimportante que pasó na parroquia foi el descubrimiento d’un nuevu mosaico na villa de San Martín n’Astaca, güeno ya oyiste el guapu pregón de Diego, un mosaico que ye una maravilla polos sus dibuxos y cenefes y perque ye del sieglo segundo y taba ahí, santin, xusto dende llevantaron la tu primera iglesia. Tú ya lo sabíes, eh, pero tenislo bien callao. Agora hai que echar una manina pa que sigan excavando y descubriendo tolo que hai n’esa villa tan grande e importante. ¡Sería la ayalga pa esti probe conceyu! Vendrín turistes de los bonos a coñocela y daría trabayu a los restoranes y a los que se encargaren de enseñala y caltenela. Hai que puxar por ello.

Hubo como siempre fiestes y una especial na que escoyeron al nuesu conceyu nel Día de los Pueblos en Navelgas; equí cellebrose el Corpus con misa y vermú, lo mesmo que los Mártires onde empresta tantu tomar algu debaxu la castañalona y El Cristu con ramera, regueranus, pinchéu y rifes de cestes que algamaron allegría a los afortunaos, too esto ye posible col sofitu de los vecinos, sobre too de Parades que dan güenes cueses pa rifar. Tamién festexamos el santu de Pablu, cuando supimos que taba malu pa day animos y los de Parades xuntámonos alredior de la Fonte Santa con misa, gaita, merienda y la fonte, enramá poles muyeres de Ca Celu. Ye poca fiesta pero que nun falte, mientres podiamos vamus faceles, hai que caltener el raigañu.

Hubo bautizu fai escasos minutos, el de Martina, que escoyeron el día la tu fiesta pa que mires bien per ella. Mercedes y Máximo, cellebraron les sus bodes d’oru xunto a los fíos, nietos y amigos. ¡Qué sigan xuntos munchos más años y con salú!

Vinieron dos neñes saharagüis a pasar el veranu a Mariñes a casa de Clara y Ramón, ¡qué guapu lo que faen!  En Mariñes hai vecinus nuevos, los que vinieron pa Ca Teresa: Javier, Rocío y el el so fío Hugo y en Ca Galán viven Javier y Nuria. En Biedes tamién hai familia nueva, la d'Ana y Santiago colos sos fíos Sergio, Carlos, Antonio y Jaime, los trés postreros comencipiaron equí al colexio de Santuyanu. ¡Qué gustu da qu'haya neños!

Na casona de Mariñes siempres hai movimientu, coles cases rurales, colos campamentos d’inglés pol veranu, coles escursiones de los collexios al centru  mediuambiental y tamién cellebren comuniones y cumpleaños, esos tolos fines de selmana. Cuntamos con una nueva casa de vacaciones, La Terrona que xunto a La Casina traen turistes a Parades. Estes cases y el restorán casa Delmiro abrennos al mundu.

Tamién tuvimos que despedinos d’algunos vecinos, güenes persones que dexen fonda memoria: Jesús de Ca Carbayeda de La Estaca, José Manuel de La Campina, Adolfo Berlique de Recastañoso, Azucena el Picho de Mariñes, Olvido el Maestro de Biedes, Luisa Ramonito de La Braña, Pepe Luis de Ca’l Roxu  de Miobra, Manolo Carís de La Estaca, Azucena Ramón de Biedes, Lola Justo de Biedes, María José de Biedes, José Bernaldo de Recastañoso, Benina Xepe de Parades, Carmina Lala de Mariñes y José Pedro de Biedes. Toos ñacieron o vivieron a la tu solombra, asina que nun t’olvides d’ellos, como de tolos que tan malus, qu’asperan que yos eches una manina.

Mira Samartín por tola xente que tenemos viviendo fora d’Asturies. Y por los que lo tán pasando mal cualesquier sía la causa.

Esta ye la hestoria de esti añu, polu menos la que yo sé, vamos prométete ser un poco más bonos y vamos pedite que dientru un añu nos golvamos a ver y si vienen más, meyor, muncho meyor. Tu yá sabes tolo que nos fai falta, pero ye que prestanos decitelo, p’dalgo yes el patrón, asina que siguimos cuntando contigo como fai milenta y tantos añus yá. Un carrao d'agradecimientos y d'abrazos de tolos tus vecinos de Biedes. ¡Hasta tolos díes, Samartín!