Muy queríu santín, patrón de nos:
Un añu más vamos contate lo qu'asocedió dende l'añu pasáu, que nun ye pocu. ¿quién nos diba a dicir fai un añu que diba pasar tolo que tamos pasando? Ai, santín, mira per nos y per tol mundu, que s'acabe llueu esta peste, que s'atope remediu, que nun muerra naide más en soledá, que la xente pueda volver al trabayu, que podamos dir recuperando. Y lo más importante de too, que nun perdamos la esperanza, qu'aprendamos a valorar lo que realmente importa, que nos curiemos perque asina curiamos a los demás.
L'añu pasáu'l día de la to fiesta pasamoslo perbién, xuntámonos 72 persones pa la comida de les bodes de plata de La Piedriquina; na sobremesa proyectóse un video que recoyía les coses que fixera esta asociación, a lo que siguió'l baile de costume cola collaboración tan valoratible de José Luis Cuesta, que siempre pon lo que meyor sabe faer, cantar.
La meyor noticia foi el descubrimiento al completu del segundu mosaicu de la villa de San Martín de La Estaca, sí ellí onde tiempu más tarde fixieron la to primer ilesia. Foi visitao a la fin de la campaña por más de 1000 persones y tovía hubo daquien que nun pudo llegar a velu. Un gran trabayu gracies a l’asociación “Amigos de la villa de San Martín de La Estaca” que lu promueve y de toos los mecenes que punxeron perres, y del meyor equipu d’arqueólogos. Foi un hecho perimportante pa esti conceyu. L'Asociación de Guíes Turísticos d'Asturies, APIT concedió en enero su premio anual a esta asociación. A finales d’esi mes presentáronse los resultados de la campaña nel Club de Prensa de La Nueva España que s’enllenó hasta la bandera, teniendo que quedar mucha xente ensin poder pasar.
Nel branu consiguieronse perres pa otra campaña, más piquiñina, onde afayáronse dos edificios onde vivía xente corriente. Ye bonu saber eso pa valorar más la dómina y les sos costumes. Pedimoste ayuda pa que pueda siguise y dalgún día pueda ser enseñao al mundu y dea muncha vida a Les Regueres.
Tuvimos una prestosa misa casi familiar la tarde la Nuechebona.
Luis Parades ganó'l premiu de Pieza Única na Feria d'artesanía de Navidá d'Uviéu y agora ye finalista de los Premios Nacionales d'Artesanía. Oxalá quede ente los meyores porque la so obra lo merez.
Ramón Fernández-Mijares foi condecoráu cola Cruz de San Raimundo de Peñafort, la máxima condecoración para un abogáu.
En Parades yá viven de seguío Jovino y Marisol que mercaron yá va un tiempu l'antigua casa Vicente. Deseyamos que vivan equí munches y bones esperiencies.
En primavera llegó'l confinamientu, foi duru, pero, equí, nesti paraísu nun podemos quexanos, somos afortunaos de vivir onde vivimos. Lo malo ye la incertidume, la medrana de perder a los seres queríos, pero con la to ayuda pasaresmoslo y seremos meyores persones.
La Piedriquina editó el so Anuariu numberu 13, nun pudo presentase, pero viose que tuvo interés perque a la fin agotose; ye qu’había artículos bien prestosos e importantes.
Tamos de norabona con les obres de la carretera, facien una falta tremenda y a lo que se ve va a quedar bien reguapa. Llástima qu’acabe ente Ca Celo. Nun tien sentíu que nun llegue a La Granda, paez mentira que per menos d’un kilometru va quedar mal.
Tamién hai que cellebrar que se llimpió La Margüera, gracies al interés d’dellos vecinus y del conceyal de Mediu Ambiente que convocó sendes estaferies. Tovía queda trabayu por facer, pero yá vinieron una parexa de coríos a añerar, vuelve la vida a esta güelga, que foi nel pasáu utilizá pa sacar marga p’abonar les tierres.
El día’l Corpus foi la primer vegada que comencipiaron les mises de nuevu. Fiximos una cellebración d’andar per casa, pero con tol ciño pa homenaxar a les persones que se fueron mientres el confinamiento y que nun habíen podíu tener un funeral como deseyaben. Ofreciose la misa per ellos y per los sos families, con aplausos pa los vecinos tan queríus y llamentando que d’algunos que tuvieron qu’ingresar nel hospital los postreros díes nun pudieron despedise ni compartir esi adiós. Les families llevaron un ramín de romero, lavanda, lloréu y tomillu, cola semeya de cada unu, como símbolu de plantas curatives que curaren tambien un pocu la pena. Compartimos con ellos el su dolor y eso ayudoyos un pocoñin. Depués foron faciendose los funerales a lo llargo del branu, daqué que deseaban con afinco.
Pal Cristo l’asociación de Les Rameres pagó los gaiteros pa allegranos un pocu. La Piedriquina nomó reguerano del añu a Fonsu Les Regueres, el nuestru Fonso. Foi una sorpresa total, pero teníen asegurau que venía, xugaron con ventaxa. Los meritos de Fonso son grandes, bien grandes. El so descubrimientu del metodu de Cogollu y d’otros facedores de gaites, revoluciona esti mundu y, lo meyor de tooo, punxolo xunto col so collaborador Pelayo Fernández, a disposición de quien quiera. Ye grande, ¿eh santín? Qué te vamos dicir si yá lu conoces de ciruelo...
Ñacieron d'algunos neños: Mauro, fíu d’Alicia Xepe, Olivia, fía de Patricia’l Ricu, María, fía de Fernando, Nora fía de Julia Corredoria y Gael, nietu de Miguel de Miobra. Mira per ellos santín, que sían felices y tou váiga-yos bien.
Nésti añu tuvimos que despedir a bonos vecinos, xente que lluchó per esta tierra nuesa y ameyoró la nuesa redolada: María el Mantequeru, Pepa Fausto, Pepe Sidru, José Alonso, Carmen Berlique, Ricardo’l barberu, Paco, Álvaro de La Rodada, Lola Xuacu, Aurelio Berlique y Luisa Asunción. Tenlos sol to cuidu y hasta que los volvamos a ver que Dios los guarde na palma de la so mano.
Queremos pidite ayuda cola peste, ayuda pa los sanitarios que nos curien, ayuda para tener cabeza y sentíu común y cumplir los encamientos a raxatabla, por nós y por tolos demás. Si lo facemos bien y tú dasnos un pequeñu emburrión, de seguro que lo llogramos. Y que nun nos falte nin un solu día la esperanza y la molición pola familia, los amigos, tolos los que nun podemos ver como quixiéramos, pero sobre manera per aquellos vecinos que sabemos que tan solos, que toos somos la tu familia y que nos ayudemos y llevemos toos bien.
Asina que, con este deseo de salud y armonía, de poner paz donde haya discordia, despedimonos hasta’l añu venideru. ¡Guardanos santín, a los que tamos aquí y a los que tan pel mundu!
Gracies per too, santín. Milenta y tantos añus en Biedes...
Un abrazu pergrande de toos los tuyos.
No hay comentarios:
Publicar un comentario